Bego Zubia. Urak aske dokumentala. -Martxoak 30an Kulturaten-

Bego Zubia Gallastegi.

Ikasketak: Informazio Zientzietan lizentziaduna, Kazetaritza espezialitatea (UPV/EHU).

Kazetari bezala lan-ibilbidea: Arrasate Press (kazetaria), Egin (Arrasatek korrespontsal, Debaldea ataleko koordinatzaile, Gizartea saileko buru), Gara (Nazioarteko erredaktore eta Gizartea saileko buru), 2005etik aurrera Elhuyar: Teknopolis zientzia-dibulgazio saioan (ETB 1, ETB 2) gidoilari/erredaktorea.

Film luze dokumentalen zuzendaritza: Sagardoa Bidegile (2016). Zuzendari eta gidoigile. Donostiako 63. Zinemaldiko Culynari atalean estreinatu zen, Urak aske (2022). Zuzendari eta gidoigile.

Irakaskuntza: Euskal Herriko Unibertsitateko (UPV/EHU) Kazetaritza I eta Ikus-entzunezko Komunikazioa sailetan irakasle (guztira 4 ikasturte).

Sariak: 2017. Euskal Ingurumen Kazetaritza Saria , “Gau bat Pirinioetako desmanarekin” ikus-entzunezkoarekin, 2022. VII Premio de Periodismo Foro Transfiere (finalista). Deskarbonizazioa helburu lanarekin.

 

Urak Aske dokumentalaren sinopsia: Urtegi batetik bi milioi metro kubiko ur hustea, desagertzeko zorian dagoen animalia txiki bat babesteko. Hori izan da Enobietako urtegia kentzeko lan egin dutenen ahalegina. Eta ametsa beteta, muturluze piriniotarrari babesleku seguru bat eman diote. Artikutzan gertatu da istorio harrigarri hori, duela mende bat Donostiak Nafarroan erositako finkan. Gaur egun, Kantauri kostaldeko baso natural onenetako bat han dago.

Normandian, aldi berean, Vezins-eko presa handia kendu dute. Hura kentzeko arrazoia izokinari Sélune ibaia zabaltzea izan da. Ibaietan utzitako hormatzarrek biodibertsitateari hesia jartzen diote eta haien eraisketek etorkizunean planeta bizigarriago bat imajinatzeko aukera ematen dute. Vezinsekoa eta Enobietakoa bezalako keinu txikien -edo handien- araberakoa izango da etorkizun hori.

Argazkien kreditoa: urakaske.eus

 

Informazio gehiago: urakaske.eus