Azaroak 2an, astelehena, gurekin izango da Alberto Iñurrategi, atxabaltar alpinista eta
eskalatzaile ezaguna eta miretsia.
Zer esan Albertori buruz? Bere kurrikuluma
ikaragarria da ... Hamalau zortzimilakoak igotzea lortu duen hamargarren alpinista izan
da munduan. Hamalau zortzimilakoetatik hamabi bere anaia Felixekin burutu zituen.
Alberto -eta bere anaia Felix- alpetar estiloko igoerak –konplexuagoak hain zuzen-
egiteagatik nabarmendu izan dira. Horrek mundu mailako elitearen gailur-gailurrean
kokatu ditu. Albertok igotzeko bide berriak ireki ditu Himalayan, sarri oso teknikoak eta
zailtasun haundikoak. Gainera, Gasherbrum I, Gasherbrum II, Gasherbrum III eta
Gasherbrum IV igo duen munduko alpinista bakarra da.
Beste alpinista eta
dokumentalista batzuekin lankidetzan, mendiko dokumental batzuk egin ditu, hala nola
“Annapurna: sueño y vacío”, “Gure Himalaya” eta “Hire Himalaya”; azken hau anaiaren
oroimenean dago, eta hainbat jaialditan saritu dute. ‘Al filo de lo imposible’ren
kolaboratzaile ohikoa ere izan da.
Emango duen hitzaldiaren gaiak ‘Porrotaren alde’
du izenburua. Norbaitek pentsa lezake, hain zuzen ere, bitxia dela emaitza hain bikainak
lortutako pertsona batek ‘porrotaren gorespena’z jardutea, eta ez arrakastaren
inguruan. Azalpena, modu batean, ‘Kissthemountain’ aldizkarian aurkitu dugu, duela
hilabete batzuk Albertori egindako elkarrizketa batean. Honelaxe zioen kazetariak:
“Emaitzari besterik begiratzen ez zaion garai honetan, zeinetan dena denboren arabera
edo lehenengoa iristearen arabera neurtzen den, eta lehia eta berehalakotasuna gero
eta nabariagoak diren, Alberto Iñurrategik leial jarraitzen die alpinismoaren mundu
osoaren mirespena ekarri dioten printzipio batzuei. Alberto, hain zuzen, edertasunaren
bila dabil mendian, heroismotik urrunduz. Antzinako esploratzaile erromantiko bat
bezala, purutasunaren bila dabilen pertsona zintzo bat bezala”
Asteleheneko
hitzaldian, beraz, gai hauetaz eta –oro har- mendizaletasunaz duen bere ikuspegi berezi-
berezi horretaz arituko da Alberto: PORROTAREN ALDE. “Zer da Himalayismoa, zer da
alpinismoa, zer da mendizaletasuna?”. “Mendian, zer da porrot egitea? Noiz egiten da
porrot? Porrotak humanizatu egiten gaitu. Gure ezinak zerk sortu duen ikasten badugu,
ez dago porrotik.”. “Gailurra egitea, askotan, ez ote da porrota ezkutatzeko aitzakia?
Gailurra posibilitateetako bat besterik ez da. Ezinbestekoa dena mendian, bidea da.”.
“Himalaya leku ideal bat izanik, nola murriztuko dugu, ba, ideal bat gailurrera?”. “Bidea
izan dut helburutzat, gailurra osagarri, Himalayan, 25 urtetik gorako ibilbidean”
Argazkien kreditua: Lydia Fdez de Luco
No hay comentarios:
Publicar un comentario