Xabier Barrutieta. Nola biziko gara etorkizunean?; Teknologia eta Anima uztartzen dituen Arkitektura. -Urtarrilak 19an Kulturaten-

Xabier Barrutieta , 1978, Donostiako Arkitekturako Goi Eskolako Karrera Amaierako Arkitekto Saria jaso zuen eta ikasketak Alemaniako Universität Stuttgarten eta Lurraldearen Diseinuko Masterrean jarraitu zituen Universitá della Svizzera Italiana unibertsitatean.

Arkitektura eta hiri-diseinuaren eta paisaiaren arloko nazioarteko hainbat estudiorekin kolaboratu du, besteak beste, Foster+Partners eta Arup nazioarteko bulegoekin. Jasotako sarien artean Espainiako Arkitektoen elkargoko arkitekto oso gazteentzat egindako hautaketa nabarmendu behar da, klimari, jasangarritasunari eta eraikuntza industrializatuari buruzko ikerketa-lanengatik. Europan10 nazioarteko lehiaketan ere saritu zuten Teruel Fusion proiektuagatik, Egurtek Basque Quality sarietan egurraren erabileragatik eta Lamp argiztapen sarietan Soraluzeko Sta. Maria la Real Elizaren Erreforma eta birgaitze integralaren obragatik.

Hernaniko Orona Ideo proiektuaren arkitekto nagusia da, jasangarritasunaren eta arkitektura berritzailearen ikur bilakatu dena. Gaur egun arkitekturaren, hirigintzaren eta diseinuaren arloetan proiektuak egiten ditu Donostiako BARRU ARKITEKTURA bulegotik. Esperientzia eta gaitasunak integratzen ditu hainbat arlotan, bezeroei proiektu integralak eskaintzeko, kalitatezko zerbitzuarekin, zorroztasun teknikoarekin eta diseinu zainduarekin.

Donostiako Arkitekturako Goi Eskola Teknikoan irakasle eta ikertzaile gisa dihardu, eraikuntza aurreratua eta berrikuntzaren kudeaketaren arloetan, eta doktoradutza-tesia prestatzen ari da Energia Positiboko eraikinen inguruan.

 

Arkitektura pertsonen ongizatea hobetzera zuzenduta dagoen jarduera kreatiboa da, eta gure ongizatean duen eragina itzela da: gure denboraren %90 eraikinen barruan pasatzen dugu, eta hiriek CO2 isuri guztien %40 baino gehiago sortzen dituzte.

Egungo desafioek orain arteko jardueraren oinarriak astintzen dituzte, eta hauen aurrean arkitektura eraikin eta hirientzat soluzio berritzaile eta disruptiboak bilatzera bultzatu du teknologia eta ezagutza berriak integratuz.

Arkitektura diseinuak energia- autosufizientzia, diseinu zirkularra, digitalizazioa eta osasuna barne hartu behar ditu, besteak beste, erronka klimatiko eta sozialari erantzun baliagarriak emateko.

Hitzaldiak estrategia berritzaile eta diseinu aurreratuak aurkeztea du helburu, baina beti ere gizartearen garapenari zuzendutako arimadun espazioak sortzea helburu dutenak.

Argazki Kreditoa: Julio Iriarte

 

Informazio gehiago :Xabier Barrutieta

Mireia Roca. Arkitektura Mugimendu Modernoaren lenguaia: Donostiako Nautikoa eraikina. -Maiatzaren 24an Kulturaten-

Mireia Roca Zeberio, Tolosako arkitektoa da. Barcelonako ‘Universitat Politécnica de Catalunya del Vallés’ Unibertsitatean ikasi zuen. Armando Roca arkitektoarekin lanean aritzen da, 1995 geroztik. EHUko Arkitektura Goi Eskola Teknikoan irakasle kolaboratzailea da, Arkitektura sailean, Estetika eta Konposizioa jakintza arloaren baitan. 2016ko geroztik Gradu Amaierako Lanen zuzendaria da eta 2020 geroztik Etxebizitza Publikoko Masterreko irakasle (Irisgarritasun Unibertsala). 2017-2020 bitartean “Arkitektura gure laguna da” EITBko Euskadi Irratian kolaboratzailea izan da Faktoria programan.

 

Astelehenean emango duen hitzaldian Donostiako Klub Nautikoaren eraikina izango du aztergai Mireia Rocak. Eraikin honek, estetika ikusgarria du, Le Corbusierren estiloan oinarritua, Kontxako badian ainguraturiko itsasontzi bat itxuratzen duela. Aizpurua eta Labaien arkitektoen lana da.

Arkitektura arrazionalista hutsa da. Europako eraikin arrazionalista goiztiar eta garrantsitzuenetakotzat jotzen da. 2000ko uztailaren 3an, Eusko Jaurlaritzak ‘monumentu’ izendatu zuen, Sailkatutako Kultura Ondasuna.

 

Hitzaldiaren heburua, baina, ez da soilik eraikin honen ezaugarri eta bere balio arkitektonikoak azaltzea, baizik eta hura inspiratu duen ‘Razionalismoa’ edo ‘Mugimendu Modernoa’ zer den zehaztea eta arkitektura lenguai horren atzean zer zegoen azaltzea: Europatik etorritako haize ufada modernoa.

Argazkien kreditoa: Julio Iriarte